أصحاب العقول فى راحة .

عدد الرسائل : 34 تاريخ التسجيل : 10/08/2008

فيه كده شوية خزعبلات لو قريتها فى مجلة ميكى حتى مش حتصدقها ..

لا لها سند ولا اصل ومتعرفش اصلا مين اللى كاتبها ..

يعنى حتلاقيها فى اى كتاب اصفر مرمى على رصيف ملهوش أى لازمة ،

لكن للاسف كمان الحكايات دى اتعملت لها مواقع عملها اصحاب العقول اللى خلاص

شربوا عليها قهوة سادة فى عمر مكرم فى القاهرة ..

فتلاقى بعض الناس اللى مخها لسع حبتين عندهم سيدهم فلان الفلاني اللى شافوه طاير فى الهوا ..

ومنهم علان العلاني اللى بيمشى على رجل واحدة

وسيدى مش عارف مين اللى بيقف على دماغه

تحس ان العملية ألبت سيرك

وفى أحد المواقع اللى عندى احساس مؤكد أن صاحبها من بتوع الموالد

لانهم بيحبوا قوى الحكايات دى ،

حاطط شوية حكاوى عاوزه ضرب النار ،

مش لانها بس تحس انها حكاوى مصاطب،

لان كمان ملهاش اى سند ممكن نحكم بيها على القصة دى حقيقية ولا لأ ،

لكن شوية قصص عاملة زى قصص أبو زيد الهلالى تتقال فى قعدة صفااااا ..

ومن ضمن تلك الحكاوى حكاية كلب شافه واحد يدعى ( العجمي) ،

شاف ايه الراجل ده .. شاف كل الكلاب ببتتجمع حول الكلب ده ،

ولما مات الكلب ، اخدته الكلاب ودفنته ، وبأه تزور الكلب وتقعد تعيط ..

يا سلام لو معاها اغنية( الكلب لولو هاو هاو) ..

تبأه كاملة من كله وليلة فله شمعة منورة

يا حلاوتك يا جمالك خليت للبتنجان ايه ..

ودى مش اخر قصص الكلاب على فكرة

يعنى تلاقى الراجل ناقل كلام عن شوية ناس ملاحيس يقول دول مشايخ

الطريقة الفلانية وكانوا بيطلبوا الغوث والمدد من الكلاب ..

اه يا عالم يا ملاحيس .. حكايات موالد ومصاطب صحيح !!

معلش اصبر عليا واستنى بأه .. لان دى حكاوى عاوزه قعدة

والراجل معجب اوى بحكاية واحد عريان ..

ويقولك الشيخ إبرهيم العريان رضى الله عنه ..

وبص بأه يقولك ايه وكان رضى الله عنه يطلع المنبر ويخطب عريانا ..

ايه يخطب عريان دى متعرفش ،

يمكن الجو حر شوية بس متوصلش انه يطلع يخطب عريان كان يقعد فى بيتهم احسن

ويشغل التكييف أو المروحة مش فارقة

الواحد بيقرأ الحاجات دى ومش مصدق ،

ان فيه ناس عقلها بأه ترالالى للدرجة دي

وبالنسبة للخزعبلات

نيجى برده لحكاية تانية متعرفش بتوع الموالد وراها ولا اصحاب ماكينات التصوير

تلاقى وانت ماشى فى الشارع واحد بيوزع عليك ورقة ..تقرأ الورقة ..

(( السلام عليكم انا الحاج أحمد أبو مش عارف ايه وأنا كنت نايم فى الروضة الشريفة

جالى الرسول فى المنام وقاللى يا أحمد الامة حالها هباب وأنا

مش راضى عن الحال ..))

بعدين عم أحمد ده يقول ايه

(( واللى مش حيوزع الورقة دى ويصورها عشرة نسخ حتصيبه بلاوى وكوارث

ففلان الفلانى رماها حصله كذا وعلان العلاني حصله كذا ))

ولا انت عارف مين الحج أحمد ده ولا يحزنون

وبعدين مين الحج احمد ده اصلا مجهول الهوية اللى الرسول صلى الله عليه وسلم يجيله

علشان يبلغ عن طريقة رسالة للأمة ؟!!

لأ وشوف .. وهو كان نايم فى الروضة ..

يعنى الروضة الشريفة اللى الناس بستنشق فيها على شبر فاضى علشان يصلوا ركعتين

ومش لاقيين ، عمنا الحاج أحمد كان نايم فيها وبيحلم كمان ..

يعنى كلام كله خزعبلات واصحاب ماكينات التصوير كانوا وراء العملية أو الله اعلم مين تاني ..

فانا مش عرفه بصراحة ايه اخرة الخزعبلات دي

ولمصلحة مين تطلع حكايات عبيطة ومريبة زى دى

بجد

أصحاب العقول

فى راحة .

والله عندك حق يا اميرة الحب
اصحاب العقول فى راحه

فعلا اصحاب العقول في راحه